నేడు కృష్ణాంగారక చతుర్దశి
బహుళ చతుర్దశి మంగళవారం కలయిక రోజు యముని , కుజుని పూజించినవారికి కలహ , ఋణ , ఆరోగ్య సమస్యలనుండి విముక్తి కలుగును. ఈ రోజు శివారాధన చేయాలి.ఈరోజు చాలా విశిష్టమైనటువంటి రోజు , ఒక్క సంవత్సరం మొత్తం సంకష్టహర చతుర్థి పూజ చేస్తే ఎంత ఫలితం ఉంటుందో ఈ ఒక్క రోజు చేసే పూజ వల్ల అంత ఫలితం వస్తుందని చెప్పారు.
పూర్వం అవంతీ నగరం లో ఉండేవాడు భరద్వాజమహర్షి , ఒకప్పుడు ఆ భరద్వాజుడు అప్సరసను చూడడంవల్ల ఆయనకి ఒక విధమైనటువంటి మోహము కలిగి దానివల్ల వీర్య పతనం అయింది. ఆయన అద్భుత వీరుడు కాబట్టి అది భూమి మీద పడేటప్పటికి అక్కడ ఒక ఎర్రటి కుసుమం కలిగిన కుమారుడు ఒక బాలుడు ఉదయించాడు , భూమిలో పుట్టాడు కాబట్టి భూదేవి అతనికి ఏడు సంవత్సరాల వయసు వచ్చే వరకు పెంచి పెద్ద చేసి ఆ తర్వాత భరద్వాజునికి అప్పగించింది ఆ మహర్షి ఆ కుమారునికి ఉప నయనం చేసి సకల శాస్త్రములు చెప్పి గణపతి మంత్రాన్ని ఉపదేశించిన ఆయన దీనిని నిష్టగా జపించాల్సిందిగా చెప్పాడు. ఈ అంగారకుడు ఆ మంత్రాన్ని నర్మదా నది తీరాన నిష్ఠగా జపిస్తే విగ్నేశ్వరుడు సాక్షాత్కరించి నీ కోరిక ఏంటో చెప్పమంటే అంగారకుడు నా పేరుతో ఈరోజు మంగళ దాయకంగా కావాలి అని చెప్పి అలాగే ఈ రోజున నీ పూజ చేసినటువంటి వారికి సమస్త కష్టములు తొలగి పోవాలి అని చెప్పి , అలాగే మూడవది దేవతల లాగా నాకు కూడా అమృతం ప్రాప్తి జరగాలని కోరుకున్నాడు , అందువల్లనే వినాయకుడు ఆయన పేరుతో ఈ రోజుని మంగళవారంగా సృష్టించడం జరిగింది. ఈరోజు మంగళవారం కావటానికి కారణం ఈ సంఘటన.
అట్లాగే ఎర్రటి వాడు కాబట్టి అంగారకుడు అని ఈ పేరు వచ్చింది. భూమికి పుట్టాడు కాబట్టి "కువలయము" కు అంటే భూమి అని కుజుడు అని కూడా అంటారు. ఈ రోజు మంగళవారం ఈనాడు బహుళ చతుర్దశితో కలిసి వచ్చింది కనుక ఈ వ్రతం చాలా శక్తి కలిగినటువంటిది.
