చండీ పారాయణ, హోమం
~~

చండీ హోమ విశేషాలు

Dasara Sharan Navaratri Special Pujas

https://shorturl.at/lmENS

దసరా ఉత్సవాలు కొద్ది రోజులలో ప్రారంభమయ్యే శుభసమయమిది.జగదంబను ప్రపంచ వ్యాప్తంగా భక్తులు పూజించే పవిత్ర తరుణమిది.
ఈ సమయంలో అత్యంత శక్తివంతమైన చండీ పారాయణ అంటే ఏమిటో? హోమం ఎందుకు ఎలా చేయాలో దాని ప్రాముఖ్యత ఏమిటో తెల్సుకుందాం!

శ్లో.శరత్ కాలే మహాపూజ!    
  క్రియతే యాచ వార్షికీ!
తస్యాం మమైతన్మాహాత్మ్యం!
శ్రుత్వా భక్తి సమన్వితః!!

శ్లో. సర్వ బాధా వినిర్ముక్తో! ధన ధాన్య సమన్వితః!
మనుష్యో మత్ప్రసాదేన!
భవిష్యతి నసంశయః!!
పై శ్లోకాలు శ్రీ మార్కండేయ పురాణంలో కలదు‌. 

ప్రతిసంవత్సరం వొచ్చే శరన్నవరాత్రులలో  నా చరిత్రను (సప్తశతి) భక్తిగా పారాయణ చేయటం ద్వారా వింటారో.. ఆ  మంత్రములచే హోమ, బలి, అన్నసంతర్పణాదలను ఒనరుస్తారో వారికి నా అనుగ్రహంచే వారికున్న సర్వబాధల నుంచి  విముక్తులై. ధనధాన్యాది సర్వసంపదలు పొందుతారని సాక్షాత్తు
ఆ జగన్మాత ఆదిపరాశక్తే దేవతలతో ఇలా చెప్పినది.

లోక రక్షకులైన అమ్మవారి స్వరూపాల్లో చండీ అవతారం చాలా విశిష్టమైనది.లోక కల్యాణం కోసం, విశేష కార్యసిద్ధి కోసం సకల చరాచర జగత్తు సృష్టికి, స్థితికి, లయకు మూల కారణమైన జగన్మాతను ఆరాధించడం అనాదిగా వస్తోంది.ఆదితత్త్వాన్ని స్త్రీమూర్తిగా భావించి చేసే ప్రకృతి ఉపాసనే శ్రీవిద్య. 

చండీ లేదా దుర్గాదేవి విజయాలను వివరించడంతోపాటు బ్రహ్మాది దేవతలు ఆమె వైభవాన్ని కీర్తించే శక్తిమంతమైన మంత్రాల కదంబమే చండీ  (దుర్గా) సప్తశతి.

1. చండీ హోమంలో ఉన్న మంత్రాలు ఎంతో శక్తివంతమైనవి...చండీ సప్తశతిలో 700 మంత్రాలు ఉంటాయని ప్రతీతి.
అయితే, ఇందులో ఉన్న మంత్రాలు 578 మాత్రమే. ఉవాచ మంత్రాలు, అర్థశ్లోక, త్రిపాద శ్లోక మంత్రాలతో కలిపి మొత్తం 700 మంత్రాలయ్యాయి. బ్రాహ్మీ, నందజా, రక్తదంతికా, శాకంబరీ, దుర్గా, భీమా, భ్రామరీ అనే ఏడుగురు దేవతామూర్తులకు సప్తసతులు అని పేరు.
వారి మహత్య్మ వర్ణనతో కూడిన మంత్రాలు కాబట్టి దీనికి చండీ సప్తసతి అనే పేరు వచ్చింది. ఇది శాక్తేయ హోమం కనక నిష్ఠగా చేయాల్సి ఉంటుంది.
దుర్గ లేదా చండీ సప్తశతి మూడు చరిత్రలుగా, 13 అధ్యాయాలుగా ఉంటుంది. తొలి భాగంలో ఒకే ఒక అధ్యాయం ఉంటుంది. రెండో భాగంలో మూడు అధ్యాయాలు, మూడో భాగంలో తొమ్మిది అధ్యాయాలు ఉన్నాయి. వీటిలో మధుకైటభ వర్ణన, మహిషాసుర సంహారం, శుంభనిశుంభుల వధతోపాటు బ్రహ్మాది దేవతలు చేసిన పవిత్ర దేవీ స్తోత్రాలు ఉంటాయి.

సప్తశతిని మూడు పద్ధతుల్లో ఆచరిస్తారు. పూజ, పారాయణ, హోమం. ఈ మూడు పద్ధతుల్లో జగన్మాతను ప్రసన్నం చేసుకుంటారు.

అతి ముఖ్యమైనది  పారాయణ. పారాయణ ఎంత చేశామో దానికి దశాంశం హోమం, దశాంశం తర్పణం ఇస్తారు.

చండీ హోమానికి సంబంధించి నవ చండీ యాగం, శత చండీ యాగం, సహస్ర చండీ యాగం, అయుత (పది వేలు) చండీ యాగం, నియుత (లక్ష) చండీ యాగం, ప్రయుత (పది లక్షలు) చండీ యాగం
చండీ పారాయణ వలన సమాజానికి జరిగే మేలు:

ఎక్కడ చండీ ఆరాధనలు జరుగుతాయో అక్కడ దుర్భిక్షం ఉండదు. దుఃఖం అనేది రాదు. ఆ ప్రాంతంలో అకాల మరణాలు ఉండవు. లోక కల్యాణం, సర్వజనుల హితం కోసం పరబ్రహ్మ స్వరూపిణి అయిన చండికా పరమేశ్వరులను పూజించాలని సూత సంహిత ఉద్ఘాటిస్తోంది.

కలియుగంలో చండీ పారాయణకు మించిన శక్తిమంతమైన ఫల సాధనం మరొకటి లేదని శాస్త్రవచనం.

ఇహపర సాధనకు చండీ హోమం ఉత్తమం. ఏడు వందల మంత్రాలతో కూడిన చండీ సప్తశతిని పారాయణ చేసి, హోమం నిర్వహించడమే చండీ హోమం.

దేశోపద్రవాలు శాంతించడానికి, గ్రహాల అనుకూలతకు, భయభీతులు పోవడానికి, శత్రు సంహారానికి, శత్రువులపై విజయం సాధించడానికి తదితర కారణాలతో చండీ యాగం చేస్తారు.

వీటిలో నవ చండీ యాగం చేస్తే వాజపేయం చేసినంత ఫలం వస్తుందట.

ఏకాదశ చండి చేస్తే రాజు వశమవుతాడని, ద్వాదశ చండి చేస్తే శత్రు నాశనమని, మను చండి(చతుర్దశ చండి)తో శత్రువు వశమవుతాడని మార్కండేయ పురాణం చెప్పినట్లు శాంతి కమలాకరంలో ఉంది.

ఇక, శత చండి చేస్తే కష్టాలు, వైద్యానికి లొంగని అనారోగ్యం, ధన నష్టం తదితరాలు తొలగుతాయి.

సహస్ర చండితో లక్ష్మీదేవి వరిస్తుంది. కోరికలు నెరవేరతాయి.

లక్ష చండి చేస్తే చక్రవర్తి అవుతాడని మార్కండేయ పురాణంలో ఉంది. దీనినే నియుత చండి అంటారు. ప్రయుత చండి అంటే పది లక్షల చండీ సప్తశతి పారాయణాలు.

వీటిలో చండీ హోమం, నవ చండీ, శత చండీ యాగాలను తరచుగా, సహస్ర చండీ యాగాలను అరుదుగా చేస్తుంటారు. అయుత చండీ యాగాలను చేయడం చాలాచాలా అరుదు. ఫలితం అనూహ్యంగా ఉంటుంది.